साहित्यिक सुनील दबडे यांना नाशिकच्या ‘तेजस’चा समाजभूषण पुरस्कार जाहीर

मोहनराव पुजारी
प्रगल्भनायक न्यूज नेटवर्क/आटपाडी:
आटपाडी तालुक्यातील गोमेवाडी गावचे साहित्यिक सुनील दबडे यांना नाशिकच्या तेजस फाऊंडेशनचा समाजभूषण पुरस्कार जाहीर झाला आहे .
फाऊंडेशनच्या अध्यक्षा मेघा डोळस यांनी पत्राव्दारे तसेच दूरध्वनीव्दारे याबाबत दबडे यांना कळविले आहे .
मंगळवार दिनांक १६ मार्च २०२१ रोजी सकाळी ११.०० वाजता मौलाना अब्दुल कलाम आझाद संशोधन केंद्र टीव्ही सेंटर औरंगाबाद येथे विविध क्षेत्रातल्या मान्यवरांच्या उपस्थितीत पुरस्काराचे वितरण होणार आहे . अखिल भारतीय साहित्य संमेलनाचे माजी अध्यक्ष जेष्ठ साहित्यिक उत्तम कांबळे यांची या सोहळ्यासाठी विशेष उपस्थिती असणार आहे .
सुनील दबडे यांनी अनेक बाल कुमार साहित्य संमेलनांची तसेच कवी संमेलनांची अध्यक्षपदे भुषविली आहेत . त्यांची ०४ पुस्तके प्रसिध्द असून त्यांना आतापर्यंत राज्यस्तरावरच्या अनेक साहित्य पुरस्कारांनी गौरविण्यात आले आहे . त्यांना आदर्श शिक्षक पुरस्कारानेही गौरविले आहे .
त्यांचे अनेक समाज प्रबोधनाचे कार्यक्रम रेडिओ व दूरदर्शनवरून प्रसारित झाले आहेत . अनेक सामाजिक विषयांना त्यांनी वृत्तपत्रातून वाचा फोडली आहे . समाजातील अंधश्रध्दा दूर व्हावी समाजात नवे विचार रुजावेत म्हणून दबडे यांनी आतापर्यंत शेकडो व्याख्याने दिली आहेत .
गोरगरिबांना , निराधारांना , विविध माध्यमातून प्रत्यक्ष आर्थिक मदत मिळवून देण्यासाठी प्रयत्न केला आहे .
समाज घडविण्यासाठी विशेष करून विद्यार्थ्यांसाठी अनेक उपयुक्त उपक्रम राबविले आहेत . त्यांनी पुढाकार घेऊन अनेक साहित्य संमेलने भरविण्यासाठी प्रयत्न केले आहेत .
कोरोना संकट काळात त्यांचे समाज प्रबोधनाचे अनेक कार्यक्रम आकाशवाणी आणि दूरदर्शनवरून प्रसारित झाले आहेत.
दबडे यांना समाजभूषण पुरस्कार जाहीर झाल्यामुळे विविध क्षेत्रातील मान्यवरांनी त्यांचे अभिनंदन केले आहे.